අපේ ඇත්තන්නේ සන්නිවේදන රටා
|
අපේ ඇත්තන්නේ සන්නිවේදන රටා
|
|
කැප ගස් සංඥා
කැප ගස් වශයෙන් නම් කරනු ලබන්නේ විවිධ බාරහාර සඳහා දෙවියන්ට වෙන් කළ පොල්ගස්.
නැතිනම් පන්සලට හෝ ගමේ දේවාලයට මේ ගස් වෙන්කරනවා.
ඇතැම් විටක උඩමළුවේ ජයසිරිමා බෝධියට – දළදා හිමියන්ට වශයෙන් ද මේ ගස් වෙන් කරන
අවස්ථා තිබෙනවා. එවිට සිදුවන්නේ මෙලෙස දෙවියන්ට හෝ පන්සලකට වෙන් කළ ගස කැප ගසක්
වශයෙන් හැඳින්වීමයි.
එම කැප ගස හිමිවන්නේ වෙන්කළ දේවාලයට හෝ පන්සලටයි.
ඒ නිසා එහි පලදාව හිමි වන්නේ ද, ඒ පලදාවෙන් ප්රයෝජන ගත හැකිවන්නේ ද අදාළ දේවාලයට
හෝ පන්සලට පමණයි.
මේ අයුරින් කැප ගසක් වෙන්කරන විට එය පුරා වසරක් – වසර තුනක් නැතිනම් ජීවිත කාලයට ම
වශයෙන් ඒ ඒ බාර අනුව හැඳින්වෙනවා.
එලෙස කැප ගසක් වෙන්කර තිබේ නම් එය අන්යයන්ට ද හැඳින්විය යුතුයි.
මේ සඳහා භාවිත කරන්නේ ද අවාචික සන්නිවේදන පිළිවෙත් රැසකුයි.
එබැවින් බොහෝ විට දීර්ඝ කාලයක් විනාශ නොවන සටහනක් සලකුණු කරනවා.
ඇතැම් විටක එම ගස් වටා ඉරි තුනක් පිංතාරු කරනවා. එම පිංතාරු වළලු තුනක් හෝ දෙකක්
නිසා ඒ ගසේ වෙනසක් කාටත් පෙනෙනවා.
නැතිනම් කිසියම් වැල් පොටකින් හෝ ලණුවකින් බඳිනවා.
එසේත් නැතිනම් ඒ ගස වටා පොල් අතු අග්ගිසි කීපයක් තබා ඒ ගසේ කඳ ආවරණය කරනවා.
මේ අයුරින් ඒ පොල්ගස විශේෂිත බව අන්යයන්ට අඟවනවා.
එවිට ඒ ගසින් පල නෙළා ගැනීමෙන් වැළකී සිටීමට හැකි වුණා.
මහින්ද කුමාර දළුපොත
|