සිංහල භාෂා දැනුම ඉහළින් ලබාදෙන පොත් පෙළක්
| |
සිංහල භාෂා දැනුම
ඉහළින් ලබාදෙන
පොත් පෙළක්
|
|
කර්තෘ :
ශ්‍රී ලංකාතිලක බෝවල
කේ.ඩී.සී. ගුණසේකර
ප්‍රකාශනය : ගොඩගේ පොත් මැදුර
සිංහල භාෂාව පිළිබඳ නිවැරැදි දැනුම ළඟා කෙරෙන අධ්‍යාපන හා මනෝවිද්‍යානුකූලව
ලියැවුණු වියරණ පොත් අපට අවශ්‍ය ය. සිංහල භාෂාව අපේ චින්තනයේ භාෂාවයි. අප තුළ
ප්‍රඥාව බුද්ධිය මෙන් ම පෞරුෂය ලියලන්නේ එමඟිනි. අප ඒ මඟින් ලබාගන්නා නිවැරැදි
දැනුම් සම්භාරයෙනි. දැනුම නිරවුල් නොවූ කල පුද්ගලයා පිරිහෙයි. සමාජයේ නොබැබළෙයි.
සමාජ පි‍්‍රයයෙක් නොවේ. එහෙයිනි ආදරයෙන් හා සැලකිල්ලෙන් භාෂාව හදාළ යුතු යැයි කීවේ.
ඒ සඳහා අපට හොඳ වියරණ පොත් පෙළක් අවශ්‍ය ය. පහළ ශ්‍රේණියේ සිට ඉහළට විහිද යන දැනුම්
මට්ටම පිළිබඳ සියුම් අවබෝධයෙන් යුතු ව ඒ පොත් පෙළ නිර්මාණය විය යුතු ය. ශ්‍රේණිගත ව
ලියැවුණු විවිධ උගතුන්ගේ පොත් බොහෝම සංඛ්‍යාවක් ඇතත් ඉහත කී ඉලක්ක පරමාර්ථයෙන්
යුක්ත ව ලියැවුණු පොතපතට අපට නැති තරම් ය. මේ අතින් කුමාරතුංග මුනිදාසයන්ගෙන් වූ
සේවය ඉහළ ය.
 මේ ඌනතාව සපුරමින් ඒ පිළිබඳ මනා අවබෝධයෙන් යුක්තව බෝවල කේ.ඩී.සී. ගුණසේකරයන්ගෙන්
ලියැවී ප්‍රකාශයට පත් ව ඇති “නිවැරැදි සිංහල ඉගෙනුම” පොත් පෙළ අපේ සිත් ගනී. ඒ එහි
ක්‍රමවේදය හෙයිනි. නිරවද්‍යතාව හෙයිනි. ළමා මනෝචාරය හා දැනුම් මට්ටම සලකා ලියා ඇති
බැවිනි.
පොත් හයකින් සමන්විත මේ පොත් පෙළ දැනටමත් දහ දොළොස් වතාවක් මුද්‍රණයෙන් ප්‍රකාශයට
පත් ව දස දහස් ගණනින්, දිවයිනේ සෑම පළාතක ම දරුවන් අතට පත් ව තිබීමෙන් හා ඔවුන් ඒවා
පි‍්‍රයමනාප ව හැදෑරීමෙන් පොත් පෙළේ සාර්ථකත්වය තීරණය කළ හැකිය.
බොහෝ ගුරුවරු ද මේ පොත් පෙළ ගුරු අත්පොත් ලෙස භාවිත කරන බව පෙනේ. මේවා ඔවුන්ගේ
ප්‍රසාදයට හේතු වී ඇත්තේ, විෂය නිර්දේශානුකූල ව හා පාසල් පොත්වලට අදාළ ව ලියැ වී
ඇති බැවිනි. පාසල් පොත්වල සවිස්තරව නොදැක්වෙන කරුණු ද මේ පොත් පෙළට අදාළ විස්තර
සහිත ව ඇතුළත් වී ඇත.
රජයේ 9 වන ශ්‍රේණියෙහි සිංහල භාෂාව පොතෙහි විභක්ති ඇතුළත් වී නැත. මේ ඌනතාව දකින
බෝවල ගුණසේකර මහතා සිය පෙළ පොතට විභක්ති ඇතුළත් කොට එහි ඌනතාව සපුරයි.
මේ සඳහා පොදුවේ කාටත් පහසු මං සපයමින්, වියරණය නීරස පාඩමක් නොවන බව පෙන්වා දෙමින්
එය වඩාත් රසවත් ව ආශාවෙන් උගත හැකි පාඩමක් බව පෙන්වා දීමට මේ පොත් පෙළේ කතුවරයා
සමත් ව සිටීම අවධාරණයෙන් සඳහන් කළ යුත්තකි.
බෝවල ගුණසේකරයන් විශ්‍රාමික ව සිටිය ද දැනට අධ්‍යාපන අමාත්‍යාංශයේ පෙළපොත් සංස්කාරක
මණ්ඩලයේ සේවයේ නියුක්තව සිටීමද මෙම කාර්යයෙහිලා යෙදුණු ප්‍රවණතාවක් වෙයි.
ව්‍යාකරණය භාෂාවේ බාධක ඉවත් කොට මං පහසුව සලසන්නකි. වියරණය නීරස පාඩමක් නොව වඩාත්
රසවත් ව පහසුවෙන් හා ආශාවෙන් භාෂාව උගත හැකි භාෂා රීති කීපයකි.
අක්ෂර වින්‍යාසය හා පද බෙදීම පිළිබඳ නිවැරැදි හා සාම්ප්‍රදායික අවබෝධයෙන් යුක්ත ව
සමහර සිංහල භාෂා පොත්වල සාවද්‍යතා ද පෙන්වා දෙමින් උචිත නිදසුන් සහිත ව සෑම පොතක ම
දරුවන්ගේ දැනුම් මට්ටමට සරිලන පරිදි ඇතුළත් කොට තිබීම මහඟු ය.
මවුබස චින්තනයේ භාෂාව බව මම ඉහතින් සඳහන් කෙළෙමි. අපි අපේ අදහස සිතිවිලි නිවැරැදි ව
පැහැදිලි ව ලියන්නේත් කියන්නේත් භාෂාවේ සාම්ප්‍රදායික පැවැත්මට අනුකූලව යමිනි. එසේ
නොවූ විට ලේඛනයත් ප්‍රකාශනයත් අවුල් වෙයි. ප්‍රබුද්ධ ව ලියන්නටත් කියන්නටත් හැකි
වනුයේ බසෙහි ඓතිහාසික හා සාම්ප්‍රදායික පැවැත්ම හදාළ විට ය.
”නුවණ ලබා දෙන දෙවියෝ අකුර යැ”යි කුමාරතුංගයෝ කීහ. අකුරු - පද – වැකි පැහැදිලි ව
නිරවුල් ව ගළපා ගැනීමේ වැදගත්කම එයට නිසි මං පෙන්වමින් බෝවල ගුණසේකරයන්ගෙන් හෙළ බසට
වන සේවය ඉමහත් ය. එමගින් බස ළැදියනට කරන ඉඟියත් දරුවනට හා ගුරුභවතුනට කරන මෙහෙයත්
අපි ඉතා ඉහළින් අගයමු.
මහාචාර්ය
බන්දුසේන ගුණසේකර
|
කර්තෘට ලියන්න
මුද්‍රණය සඳහා