Holly wood
Holly wood
'මහාචාර්ය ස්නේප්'
සමුගනී
ඇලන් රික්මාන්ව ඔබ හඳුනනවාද? එනමින් ඔහු ඔබට ආගන්තුක අයකු වෙන්න ඇති. නමුත්
ඔබ 'හැරී පොටර්' චිත්‍රපට රසිකයකු හෝ රසිකාවියක නම් මහාචාර්ය ස්නේප් ව
දන්නවා ඇති. හැරීපොටර් චිත්‍රපට මාලාවේ මහාචාර්ය ස්නේප් ගේ චරිතය නිරූපණය
කළේ ඇලන්.
මේ ප්‍රවීණ රංගන ශිල්පියා පසුගියදා මුළු ලොවම වෙසෙන රසික ජනතාවගෙන් සදහටම
සමුගත්තා. වයස අවුරුදු 69 දී ඔහු මිය ගියේ පිළිකා රෝගය වැලඳීමෙන්.
ඇලන් මුලින්
ම රඟපෑවේ 1978 දී විකාශය වූ 'රෝමියෝ ජුලියට්' ටෙලි වෘත්තාන්තයේයි. පුළුල්
තිරයට ඔහු පා තැබුවේ 1988 දී තිරගත වූ 'ඩයි හාඩ්' චිත්‍රපටයේ රඟපෑමෙන්.
ඇලන් විවාහ දිවියට ඇතුළත් වී ඇත්තේ පසුගිය වසරේදී යි. ඒ, රිමා හෝට්න් සමඟයි.
ඔවුන් දෙදෙනා එලෙස නිත්‍යනුකූලව විවාහ වුණත් වසර 38ක පමණ කාලයක් එකට ජීවත් වූ
බවයි පැවසෙන්නේ.
විවාහ දිනයේදී තමන් රිමා ට මංගල මුදුවක් තෑගි කළත්, ඇය එය කෙදිනකවත් පලඳා
නැතැයි මුව'ග රැඳුණු සිනහවකින් යුතුව ඇලන් කියා සිටියේ මිය යන්නට මාස
කිහිපයකට කලින්.
ඉක්මනින්ම 'මිසිස්'
වෙන්න ඕනෙලු
 ගායිකා මිලේ සයිරස් සහ ජනප්‍රිය නළු ලියම් හෙම්ස්වර්ත් ගේ ආදර කතාව ඇරැඹුණේ
2010 දීයි. ඒ, 'ද ලාස්ට් සොන්' චිත්‍රපටයේ රූගත කිරීම් සිදුවෙද්දීයි. එතැනදී
කතාබහ කළ දෙදෙනා අතර ඇතිවුණු ප්‍රේමය පැවතුණේ අවුරුදු 3ක කාලයක් පමණයි. මීට
වසර 2 කට කලින් මිලේ සහ ලියම් වෙන් වුණා.
යළිත් මේ දෙදෙනා එක්වුණු බවයි, මෑතකදී ආරංචි වුණේ. ඔවුන් විවාහ ගිවිසගෙන ඇතැයිද
කසු කුසුවක් පවතිනවා. මිලේ පවසන්නේ ඇයට ඉතා ම ඉක්මනින් 'මිසිස් හෙම්ස්වර්ත්'
වෙන්නට අවශ්‍ය බවයි.
ඉක්මනින් ම විවාහ විය යුතු බවත් ඇය ලියම් ට පවසා තිබෙනවා.
විවාහ මංගල උත්සවය මහ ඉහළින් පැවැත්විය යුතු යැයි ද ඇය, තම සහකාරයාට
සෙනෙහෙබරව පැවසුවාලු.
ලියම් සහ මිලේ ගේ සමීපතම හිතවත් පිරිස පවසන්නේ දෙදෙනා හොඳින් ම ගැළපෙන බවය.
මේ
වනවිට ලියම් ගේ වයස 26 යි. මිලේ, 23 වැනි වියෙහි පසුවෙනවා.
ස්ටැලෝන්
බිරිඳට පරදියි
 හොලිවුඩ් සිනමාව තුළ අයෝමය ශක්තිය පෙන්වූ ප්‍රවීණ නළු ආනෝල්ඩ් ශ්වසනෙගර්
ඇමරිකානු දේශපාලනයටත් සම්බන්ධ වුණා. රිපබ්ලිකන් පක්ෂයෙන් කැලි‍ෆෝනියා
ප්‍රාන්තයට තරග කළ ඔහු, එම ප්‍රාන්තයේ ආණ්ඩුකාර ධුරයට පත්වුණා.
ශ්වසනෙගර් වැනි තවත් වීර චරිතයක් තමයි, සිල්වෙස්ටර් ස්ටැලෝන්. ඔහු තුළද
දේශපාලනය කිරීමේ සිතුවිල්ලක් පහළ වෙලා. කුමන දේශපාලන පක්ෂයකින් දැයි දන්නේ
නැහැ.
කොහොම වෙතත් තමන්ගේ සිත තුළ නළියන අදහස ඔහු, සිය බිරිඳට පැවසුවා. “මටත්
දේශපාලනය කරන්න ආසයි. මොකද ඔයා ඒ ගැන හිතන්නෙ?“ ඔහු තම බිරිඳ ජෙනිෆර්
ෆ්ලැවින්ගෙන් ඇසුවා. “ඔයාට පිස්සුද?“ඇය එක්වරම ඔහුගෙන් පෙරළා ඇසුවේ නළල රැලි
ගන්වමින්.
තවදුරටත් ඒ ගැන කතා කිරීමෙන් වැඩක් නොවන බව තේරුම් ගත් මේ 'වීරයා'
බිරිය ඉදිරියේ පරාජයට පත්වූවා.
ඔස්කා
සම්මානයත්
ලැබෙයි ද?
පසුගියදා පැවැති ගෝල්ඩන් ග්ලෝබ් සිනමා සම්මාන උළෙලේ දී හොඳම නිළිය ලෙස කිරුළු
පැළඳූ රුවැති යෞවනිය ගැන මුළු ලොවේ ම අවධානය යොමු වෙලා. ඇය තමයි, බ්‍රී ලාසන්.
ඇය හොඳ ම නිළිය ලෙස ගෝල්ඩන් ග්ලෝබ් සම්මානයෙන් පුද ලැබුවේ 'රූම්' නමැති
චිත්‍රපටයේ රඟපෑමෙන්.
එවැනි තවත් ජයග්‍රහණයක් ඇය වටා සැරිසරමින් තිබෙන
බවයි එම සම්මානයේ උණුසුම මැකී යන්නට පෙර ආරංචි වුණේ.
ඇගේ නම ඔස්කා සම්මාන උළෙලේ හොඳ ම නිළිය තෝරන නම් ලැයිස්තුවටත් නිර්දේශ වෙලා.
'රූම්' චිත්‍රපටයේ රංගනය වෙනුවෙන්මයි ඇගේ නම ඔස්කා උලෙළටත් නිර්දේශ වී
ඇත්තේ.
ඇය මේ බව දැන ගත්තේ ඔස්ට්‍රේලියාවේ චිත්‍රපට රූගත කිරීමක යෙදී
සිටිද්දීයි.
බ්‍රී ලාසන් ගේ නම ඔස්කා සම්මානයට නිර්දේශ වී ඇත්තේ තවත් ප්‍රවීණ නිළියන් කිහිප
දෙනකු එක්කයි. ඒ අය තමයි, ජෙනිෆර් ලෝරන්ස් සහ කේට් බ්ලැන්චට්.
1998 දී සිනමා රංගනයට පිවිසුණු බ්‍රී, ගී ගායනයටත් දක්ෂයි. කෙටි චිත්‍රපට 2
ක් ද අධ්‍යක්ෂණය කර ඇති ඇය තවමත් 26 වැනි වියෙහි
පසුවනවා.
සුජීව තේවහෙට්ටිගේ
|
කර්තෘට ලියන්න
මුද්‍රණය සඳහා
