දිස්ත්‍රික්ක 7ක නායයෑමේ අවදානමක්
දිස්ත්‍රික්ක 7ක නායයෑමේ අවදානමක්
නිහාල් පී. අබේසිංහ
මේ දිනවල පවතින අධික වර්ෂාව සමඟම බදුල්ල මහනුවර, නුවරඑළිය, කළුතර,
රත්නපුර, කෑගල්ල හා මාතර දිස්ත්‍රික්කවල ස්ථාන ගණනාවක නායයෑමේ ලක්ෂණ මතුවී
ඇති බවත් ඒ ස්ථාන පිළිබඳව අදාළ පළාත් හා ප්‍රාදේශීය බලධාරීන් දැනුම්වත් කර
ඇති බවත් ජාතික ගොඩනැඟිලි පර්යේෂණ සංවිධානයේ නායයෑම් පර්යේෂණ අංශ ප්‍රධානී
ආර්.එම්.එස්. බණ්ඩාර මහතා පවසයි.
යම් ස්ථානයක් නාය යෑමට තුඩුදෙන ස්ථානයක් බවට පර්යේෂණ මගින් අනාවරණය වූ විට
එය පිළිබඳව අදාළ ප්‍රාදේශීය ලේකම්වරයාට අදාළ වතු අධිකාරින්ට දන්වන බවත් ඒ
අනුව කොස්ලන්දේ නායයෑම සිදුවූ ස්ථානයෙන් ඒ ජනතාව ඉවත් කරන ලෙසට 2005 හා 2011
වසරවලදී ලිඛිතව දන්වා ඇති බවත් බණ්ඩාර මහතා පැවසීය.
මේ අතර බණ්ඩාරවෙල ලියන්ගහවෙල ප්‍රදේශයේ නිවාස 15 ක් පමණ නාය යෑමේ දැඩි
අවධානමක පවතින බවත් ඇල්ල ප්‍රදේශයේ ස්ථාන කීපයක් දැඩි අවධානමක පවතින බවත්
බණ්ඩාර මහතා පවසයි. ඒ ස්ථානවලින් ජනතාව ඉවත් කරන බවත් ඔහු කීය.
ආපදා කළමනාකරණ අමාත්‍යාංශයට හැකියාව ඇත්තේ නායයෑම් සිදුවීමට ඉඩ ඇති
ස්ථානය පෙන්වා දීමට පමණි. නමුත් ඉන් ජනතාව ඉවත්කිරීමේ හෝ ඔවුන්ට ඉඩම් ලබාදීමේ
බලය ඔවුන්ට නැති බවත් ඒ අනුව ඉහත බලතල එම අමාත්‍යාංශයට හා ආපදා කළමනාකරණ
මධ්‍යස්ථානයට ලබාදිය යුතු බවත් මේ පිළිබඳව පර්යේෂණ කරන විශ්වවිද්‍යාවල
විද්වතුහු පෙන්වා දෙති.
|
කර්තෘට ලියන්න
මුද්‍රණය සඳහා
