සුමිගෙන් අහන්න

කැප්පෙටිපොළ චරිතය අළලා සයිමන් තිරකතාවක් ලීවාද?

අත්තනගල්ලේ විමලසේන සපුතන්ත්‍රි

ප්‍රශ්නය - සුජාතා අත්තනායක ගයන ‘පෙම්වත තරහා වෙලා නිහඬව ඉන්නේ ඇයි’ ගීතය මොහොමඩ් ගවුස්ගේ තනුවක් බව කියැවෙනවා. ඒ ගීතය නිර්මාණය වෙද්දී ගවුස් මාස්ටර් ජීවතුන් අතර සිටියේ නැහැ නේද?

පිළිතුර - ඒක ගවුස් මාස්ටර්ගේ පරණ තනුවක්. මුල් ගීතය ගයා ඇත්තේ සුජාතාගේ මවයි. ඒ තනුවට අනුරූපීව තමයි සුනිල් ආර්. ගමගේ ඉහත ගීතය සුජාතාට ලියා තිබෙන්නේ.

වත්තල හේකිත්තේ ලක්ෂ්මන් රණසිංහ

ප්‍රශ්නය - පියදාස සිරිසේනගේ ඇතැම් නවකතාවල එන කෝන්ගොඩ වික්‍රමපාලගේ චරිතය ජේම්ස් බොන්ඩ් වර්ගයේ චරිතයක් ද?

පිළිතුර - ඔව්. ඔව් එය රහස් පරීක්ෂක චරිතයක්.

මත්තේගොඩ අජිත් ජෝතිය කරසිංහ

ප්‍රශ්නය - ගාමිණි - මාලිනි සුසංයෝගය තරම් ගාමිණි - ගීතා, ගාමිණි - වීණා, ගාමිණි - ස්වර්ණා කහවිට, ගාමිණි - ෆරිනාලායි සුසංයෝග සාර්ථක නොවුණේ ඇයි?

පිළිතුර - ඒ මාලිනිගේ සුවිශේෂ රංග මහිමය.

මීගමු මහහුණුපිටියේ යොහාන් කුමාර් ද සිල්වා

ප්‍රශ්නය - සයිමන් නවගත්තේගම කැප්පෙටිපොළ චරිතය අළලා චිත්‍රපට තිරකතාවක් ලිව්වා ද?

පිළිතුර - ඔව්. ඔහු එය ලීවේ විජය කුමාරතුංග වෙනුවෙන්. ඒ සඳහා එකල ඔහුට රුපියල් 20 දාහක අත්තිකාරමක් ද ගෙවනු ලැබ තිබුණා.

පිළියන්දල චාමර විජේසිංහ

ප්‍රශ්නය - සිංහල සිනමාවේ හොඳම ගීතමය පෙම් ජවනිකාව කුමක් ද?

පිළිතුර - ‘තුෂාරා’ චිත්‍රපටයේ ‘ජීවනයේ මීවනයේ’ ගීතය රැගත් පෙම් ජවනිකාව. රඟපෑවේ විජය සහ මාලිනි.

මැදවච්චියේ ගුණපාල ජයසේකර

ප්‍රශ්නය - ලංකාවේ ටෙලිනාට්‍ය අධ්‍යක්ෂවරුන්ගේ එක්දින වැඩමුළුවක් වෙරළබඩ හෝටලයක පවත්වන්නේ නම් ඔබ කැමැති ද?

පිළිතුර - ඔව්. එතකොට සුනාමියක් එහෙම ආවම ඔක්කොම ටික එක සැරේ මුහුදට ගහගෙන යනවනේ.

මෝදර එම්. රුෆිනස් ඩයස්

ප්‍රශ්නය - ‘මිහිඳුම් සිහින’ චිත්‍රපටයේ රූ ගැන්වීම් සිදු වූයේ කොහේ ද?

පිළිතුර - සමනල කන්ද පැහැදිලිව පෙනෙන මස්කෙළිය, ලක්ෂපාන වැනි තැන්වල.

මේ අයත් ප්‍රශ්න එවා තිබුණා. බණ්ඩාරවෙල අඹේගොඩ දේශානි මාධවී, කපුගොඩ මාළිඳ සරත් රණසිංහ, ගම්පහ පත්මාවෝ මහේෂ්වරි හේරත්, මඩකළපුවේ ඩුෂානි තාරුකා සසිදරන්.