ඔරියන්ට් ෆයිනෑන්ස් විසින් පසුගියදා සිය නවතම වෙබ් පිටුව එළිදක්වන ලදී. මෝටර් රථ ගැනුම්කරුවන්ට සහ අලෙවිකරුවන්ට වැ‍ඩි පහසුවක් ‍සලසමින් සැකසූ මෙම වෙබ් පිටුව ශ්‍රී ලංකා මොටර් රථ ආනයනකරුවන්ගේ සංගමයේ සභාපති මහින්ද සරත්චන්ද්‍ර මහතා විසින් එළිදක්වනු ලැබීය.

මෙම අවස්ථාවට සහභාගි වූ ඔරියන්ට් ෆයිනෑන්ස් හි ප්‍රධාන විධායක නිලධාරි සුරේෂ් අමරසේකර මහතා පැවසූ අයුරින් මෙම වෙබ් පිටුව නිමවා ඇත්තේ පාරිභෝගිකයන්ගේ වෙනස්වන අවශ්‍යතාවන්ට අනුව සකසන ලද උසස්, අමතර සේවාවන් ද ඇතුළත් Trade in offer පහසුකම් සැපයීම අරමුණු කරගෙනයි. “මෙම ඔන්ලයින් පහසුකම හරහා අලෙවිකරුවන් සහ ගැනුම්කරුවන් අතර වඩාත් හොඳ සබඳතාවයක් ගොඩ නැංවීමට බලාපොරොත්තු වෙනවා. http://www.orientfinance.lk වෙබ් අඩවිය හරහා මෙම වෙබ් පිටුවට පිවිසිය හැකියි”.

මෙම වෙබ් පිටුවේ සඳහන්ව ඇති තෝරාගත් මෝටර් රථ අලෙවිකරුවන් සහ මෝටර් රථ මාදිලි සමස්ත දිවයිනම ආවරණය වන ලෙසින් පෙළ ගැසී ඇත. සිය මෝටර් රථය වෙනත් මෝටර් රථයකට ‍උත්ශ්‍රේණි කරගැනීමට කැමැත්තක් දක්වන ගැනුම්කරුවන්ට මෙම වෙබ් පිටුවට පිවිස තමන් කැමැති ආකාරයේ මෝටර් රථයක් තෝරාගෙන අදාළ අලෙවිකරු ද සමඟින් ගනුදෙනුව සිදු කළ හැකි ය. නව මෝටර් රථය සහ පැරණි මෝටර් රථය අතර කිසියම් මුදල්මය හිඟයක් පවතී නම් ඒ සඳහා අවශ්‍ය ණය පහසුකම් ඔරියන්ට් ෆයිනෑන්ස් වෙතින් ලබාගත හැකි ය. මෙම පහසුකම් තවත් ඉහළ නංවමින් ඉදිරියේදී අලෙවිකරුවන්ට සහ ගැනුම්කරුවන්ට වඩාත් හොඳ පහසු සේවාවක් සැපයීමට සමාගම බලාපොරොත්තුවේ.

මෙම අවස්ථාවේ දී අදහස් දැක්වූ සරත්චන්ද්‍ර මහතා මෙවන් යමක් ආරම්භ කිරීම පිළිබඳව ඔරියන්ට් ෆයිනෑන්ස් පැසසුමට ලක් කරමින් පවසා සිටියේ මින් සිය සංගමයේ සාමාජිකයින්ට පවා වඩාත් පිරිමැසුම්දායි ලෙසින් දිවයින පුරා සිටින ගැනුම්කරුවන් හා සම්බන්ධ විය හැකි බවය‍. අලෙවිකරුවන් හට විශාල ගැනුම්කරුවන් පිරිසක් සමඟ හා ගැනුම්කරුවන්ට විශාල මෝටර් රථ මාදිලි පරාසයක් සමඟ සම්බන්ධ වීමේ හැකියාව ලබාදෙන මෙම අවස්ථාව දෙපිරිසටම ඉතාමත් වටිනා අවස්ථාවක් බවත් ඒ මහතා කීය.